“Report”: “Kahramanmaraşda zəlzələdə iki Azərbaycan vətəndaşı həlak olub, biri hələ də dağıntılar altındadır”
“Türkiyənin Kahramanmaraş şəhərində baş vermiş zəlzələ zamanı iki Azərbaycan vətəndaşı həlak olub, biri dağıntılar altında qalıb”.
“Report”un Türkiyəyə ezam olunmuş əməkdaşının xəbərinə görə, bunu Kahramanmaraş Sütçü İmam Universitetinin azərbaycanlı müəllimi Həmran Əmirli jurnalistlərə açıqlamasında deyib.
Onun sözlərinə görə, Kahramanmaraşda dağıntılar altından sağ çıxarılan azərbaycanlı tələbənin vəziyyəti hazırda yaxşıdır:
“Kahramanmaraş Sütçü İmam Universitetində 60-a yaxın azərbaycanlı tələbə vardı. Zəlzələ baş verən zaman ali təhsil müəssisəsinin tələbəsi Göyçə Baxşəliyeva dağıntılar altında qalmışdı. O, təbii fəlakətdən 30 saat sonra dağıntılar altından sağ çıxarıldı. Hazırda vəziyyəti yaxşıdır, müalicə olunur. Müalicəsi yekunlaşandan sonra Azərbaycana təxliyə ediləcək. Azərbaycanın Türkiyədəki səfirliyi ilə birlikdə buradakı digər tələbələrimizi avtobus vasitəsilə Azərbaycana təxliyə etdik. Təxminən 50-dən çox tələbəni zəlzələdən sonra Azərbaycana yola saldıq”.
“Kahramanmaraşda hadisə zamanı iki Azərbaycan vətəndaşı həlak olub. Biri şəhərin Elbistan rayonunda, digəri isə şəhər mərkəzində dağıntılar altında qalaraq vəfat edib. Onlar dağıntılar altından çıxarıldılar və meyitləri səfirliyimizin əməkdaşları ilə birlikdə Azərbaycana göndərildi. Hazırda isə Kahramanmaraşda dağıntılar altında bir Azərbaycan vətəndaşı qalıb. Qadının qızı buradadır. Həmin xanımla dünən danışmışam və anasının hələ də dağıntılar altında qaldığını bildirir. Hər gün Azərbaycan səfirliyi vətəndaşımızla əlaqə saxlayır. Həmin qadın oradan çıxarıldıqdan sonra Azərbaycana təxliyə ediləcək”, - H.Əmirli vurğulayıb.
