“Qardaşım şəhid olandan 3 ay sonra anam dözmədi, ürəyi partladı öldü. Anamdan sonra da atam yaşamadı, 3 ay sonra beyninə qan sızdı və komaya düşərək vəfat etdi. 8 nəfərlik ailəmiz köhnə mebel sexinin zirzəmisində məskunlaşıb. Çox dözülməz şəraitdə yaşayırıq, bizimlə maraqlanan yoxdur”.

Bu şikayətlə “Qafqazinfo”ya Vətən müharibəsinin 19 yaşlı şəhidi Nurlan Nuruzadənin qardaşı Rövşən Nuruzadə müraciət edib. O bildirib ki, hazırda yaşadıqları zirzəmiyə şəhid qardaşının 3 yaşı olanda sığınıblar. Nurlanı cəbhəyə də elə buradan yola salıblar. Ailə yalnız R. Nuruzadənin sürücü işləyərək aldığı 600 manat maaşla çətinliklə dolanır: “Evdə bir subay bacım və qardaşım, həmçinin iki övladı ilə boşanmış bacım var. Bacımın uşaqlarından biri şəkərli diabet xəstəsidir, insulin iynəsi ilə yaşayır. Özüm də 4 ildir ki, anasız iki övlad böyüdürəm. Uşaqların da üçü məktəblidir, bütün xərcləri qarşılamaqda çətinlik çəkirəm. Bütün ailə mənim himayəmdədir, heç bir yardım, heç bir dəstək yoxdur. Necə dolanırıq Allah şahiddir. “YAŞAT” Fondundan yararlana bilmirik, deyirlər, siz varis sayılmırsız. Bizə ev verilmir, yenə də deyirlər varis deyilsiniz. Ata-anam övlad dərdindən vəfat edib, onlar dünyalarını dəyişəndə evi özləri ilə aparmayacaqdılar ki, uşaqlarına verəcəkdilər də. Heç olmasa, yerdə qalanları yaşatsınlar...”

R. Nuruzadə bildirir ki, digər qardaşı mədə xəstəliyindən əziyyət çəkir, bu səbəbdən ağır işlərdə işləyə bilmir. Həmçinin bacıları da təhsilsizdirlər, onlara qeydiyyat işi və ya digər münasib iş olsa, heç olmasa ailə çətin vəziyyətdən çıxar. “Bir ildir Sumqayıtın icra başçısının qəbuluna düşə bilmirdim. Qardaşımın şəhidliyinin il dönümündə gəlmişdi. Ona da müraciət etdim. Deyirlər yaxşı olacaq...”, - şikayətçi bildirir.

Şikayətlə bağlı “YAŞAT” Fondundan “Qafqazinfo”ya bildirilib ki, şəhid Nuruzadə Nurlan Tofiq oğlunun ailəsinin qeydiyyatı Fond tərəfindən 2020-ci il 17 dekabr tarixində aparılıb. Ailə ilkin olaraq onlara müalicə xərcinin qarşılanması üzrə yardım edilməsini, eyni zamanda evlə təminat istəyib: “2021-ci il mart ayında şəhidin valideyni müayinə edilməsi məqsədilə klinikalardan birinə yönləndirilib, 53.10 AZN məbləğində müayinə xərci və 412.60 AZN dəyərindəki dərman vasitələri Fond tərəfindən alınıb. Evlə təminat məsələsi isə "YAŞAT" Fondunun fəaliyyət istiqamətlərinə daxil deyil. Şəhidin ata və anası vəfat edib. Şəhidin qardaşı isə şəhid ailəsi statusuna malik olmadığından ona yardım edilməsi Fondun səlahiyyətinə aid deyil”.

“YAŞAT” Fondundan həmçinin qeyd olunub ki, şəhidin qardaşı bu ilin iyun ayında ASAN Xidmətin tabeliyində olan “İnnovasiyalar Mərkəzi”ndə işə qəbul edilib.

Sosial Xidmətlər Agentliyindən də oxşar cavab aldıq. Agentlikdən verilən məlumatda qeyd olunub ki, şəhid adının əbədiləşdirilməsi və şəhid ailələrinə edilən güzəştlərin tətbiqi qaydalarına əsasən şəhidin həyat yoldaşı, valideynləri, 18 yaşadək uşaqları (əyani təhsil alanda isə 23 yaşa çatanadək) şəhidin ailə üzvləri hesab olunurlar: “Şəhidin bacı və qardaşları ailə üzvü hesab olunmadığı üçün evlə təmin olunmaq məsələsi Əmək və Əhalinin Sosial Müdafiəsi Nazirliyinin səlahiyyətləri xaricindədir”.

Dövlət Məşğulluq Agentliyindən isə sorğumuza cavab olaraq bildirilib ki, Sumqayıt şəhər sakini Rövşən Nuriyevin müraciəti ilə bağlı Agentlik tərəfindən bir neçə dəfə ailə ilə görüşülüb, məşğulluqlarına dəstək olmaq üçün iş aparılıb: “Rövşən Nuriyev hazırda ASAN Xidmətdə sürücü işləyir. Onun bacısı Nuriyeva İlahə Tofiq qızı postmüharibə tədbirləri çərçivəsində növbədənkənar özünüməşğulluq proqramına cəlb edilərək 29.12.2020 tarixində gözəllik salonu sahəsi üzrə aktivlərlə təmin edilib. R.Nuriyevin digər bacısı Canəliyeva Könül Tofiq qızı da Agentlik tərəfindən kiçik dərzi sexi sahəsi üzrə özünüməşğulluq proqramına cəlb edilib. Artıq o, təlimlərdə də iştirak edib. Yaxın zaman müvafiq aktivlərlə təmin ediləcək. Vətəndaşın qardaşı Nuruzadə Elşən Tofiq oğlu ilə bağlı danışılıb, artıq Məşğulluq altsistemində qeydiyyata alınıb və ona boş yerləri təklif edilərək seçimi əsasında uyğun vakansiya üzrə göndəriş formalaşdırılıb. İşəgötürən tərəfindən müvafiq qərar qəbul edildikdən sonra E.Nuruzadə əmək fəaliyyətinə başlayacaq”.

Sumqayıt Şəhər İcra Hakimiyyətindən də şəhid ailəsi ilə görüşdüklərini və köməklik lazım olarsa, ediləcəyi bildirilib.