Son günlər dövlət sərhədlərimizdə Azərbaycan Ordusuna qarşı təxribatlar törədən Ermənistan, nəyin bahasına olursa-olsun, Kollektiv Təhlükəsizlik Müqaviləsi Təşkilatını (KTMT) prosesə cəlb etmək istəyir. Bir daha təsdiqlənir ki, ermənilər məqsədli şəkildə sərhəd gərginliyi yaratmaqla KTMT-ni proseslərə qoşmağı hədəfləyiblər.

Erməni KİV-lərinin yazdığına görə, Ermənistanın xarici işlər naziri Ararat Mirzoyan KTMT-nin baş katibi, Belarus təmsilçisi Stanislav Zasa zəng edib. Mirzoyan ənənəsinə sadiq qalaraq, son baş verənlərə görə Azərbaycanı ittiham edib, ölkəsinin suveren ərazisinə müdaxilə olunduğu haqda yalanlar danışıb. A.Mirzoyan guya özlərinin 9-10 noyabr razılaşmasına əməl etdiklərini də deyib. Qeyd olunur ki, tərəflər vəziyyətin stabilləşdirilməsi imkanlarından bəhs ediblər. Erməni mediası S.Zasın fikirləri barədə hər hansı əlavələr etməyib. KTMT-nin Ermənistana hər hansı dəstək vermədiyi bəllidir.

Maraqlıdır ki, Ermənistanın baş naziri Nikol Paşinyan da Belarus prezidenti Aleksandr Lukaşenko ilə Ermənistan-Azərbaycan sərhədindəki vəziyyəti müzakirə edib. Bu barədə Belarus prezidentinin mətbuat xidməti xəbər verir. Telefon danışığı zamanı tərəflər Ermənistan və Belarusdakı vəziyyət barədə bir-birini məlumatlandırıb, Kollektiv Təhlükəsizlik Müqaviləsi Təşkilatı çərçivəsində problemli məsələləri müzakirə ediblər. Ermənistanın baş naziri Belarus prezidentinə Ermənistan-Azərbaycan sərhədindəki vəziyyət və onun mümkün inkişaf yolları barədə də məlumat verib.

Aydındır ki, hər iki telefon zəngi məhz KTMT-ni bu proseslərə cəlb etmək istəyindən doğur. Belarus prezidenti Aleksandr Lukaşenko özünü Bakının dostu rolunda təsdiqləyib. Təsadüfi deyil ki, Zəfər günündə Lukaşenko Azərbaycan Prezidenti İlham Əliyevə zəng edərək tarixi zəfərlə bağlı təbriklərini çatdırmışdı. KTMT-də Ermənistanla formal müttəfiq olan Lukaşenko Qarabağın işğalda olduğu illərdə də Azərbaycanın mövqeyini dəfələrlə müdafiə edib ki, bu da Ermənistanı narazı salmaya bilməz.

Sərhəddə baş verən son erməni təxribatından sonra isə Ermənistan israrla bu məsələdə ən azı KTMT baş katibindən özlərinə sərf edən bir bəyanat almağa cəhd edir. Paşinyanın Lukaşenkoya zənginin səbəbi məhz bu ola bilərdi. Ermənistan KTMT təmsilçisindən və Belarus prezidentindən nə istəyir, özlərinə tərəf çəkə bilərlərmi?

Politoloq İlyas Hüseynov “Yeni Müsavat”a bildirdi ki, Ermənistan uzun müddətdir bütün gücü ilə KTMT-ni regiona cəlb etməyə çalışır. 2020-ci ilin iyul ayında Tovuz istiqamətində Ermənistanın törətdiyi məlum genişmiqyaslı təxribat məhz KTMT-nin münaqişəyə cəlb edilməsinə nail olunması üçün idi: “İrəvan daim cəhd edir ki, Azərbaycanla sərhəddə müharibə görüntüsü, guya Azərbaycanın Ermənistanın ərazi bütövlüyünü pozduğu və Ermənistan ərazisində müharibə apardığı görüntüsünü yaratsın. Tovuz təxribatı zamanı Ermənistan hakimiyyətinin KTMT-ni cəlb etmək istəyi baş tutmadı. Sonra 44 günlük müharibə dövründə də İrəvan müxtəlif təxribatlarla, cəhdlərlə dəfələrlə çalışdı ki, KTMT işə qarışsın. O zaman da istəyi havada qaldı. Nikol Paşinyanın Vladimir Putinə və Aleksandr Lukaşenkoya, KTMT baş katibinə zəngləri, yalvarışları nəticə vermədi. Ermənistanın xeyrinə hətta adi bir bəyanat da olmadı. KTMT-də əsas söz sahibi olan Rusiya ilə Azərbaycanın qurduğu münasibətlər, həmçinin Belarus lideri ilə Azərbaycan Prezidentinin dostluq münasibətləri, eləcə də Qazaxıstan və Qırğızıstanın haqlı mövqeyi Ermənistanın ”KTMT kartını" işə salmaq niyyətini heçə endirdi. KTMT-nin regiona cəlb olunması planlarının iflasa uğramasında həm də Ermənistanın bu qurumda nüfuzunun çox aşağı olması, KTMT-ni şantaj eləməsi ilə bağlıdır. Şübhəsiz ki, Aleksandr Lukaşenkonun Ermənistana deyil, Azərbaycana çox yüksək münasibətinin olması amili də bu iflasda öz sözünü deyir. Məhz buna görədir ki, Ermənistan son zamanlar Belarusu, xüsusilə də Lukaşenkonu daha çox öz tərəfinə çəkmək üçün addımlar atır. Lakin mən əminəm ki, indiyə qədər olduğu kimi, bundan sonra da Ermənistanın cəhdləri boşa çıxacaq. Lukaşenko Ermənistanın haqsız mövqedə olduğunu çox gözəl bilir, eyni zamanda nüfuzu olmayan şantajçı bir ölkəyə görə Azərbaycanla dostluq münasibətlərini riskə atmaz".

Politoloqun sözlərinə görə, Ermənistan hakimiyyətinin təmsilçiləri belə tez-tez bəyan edirlər ki, KTMT-də olan dövlətlər Ermənistanla deyil, Azərbaycanla daha yaxın münasibətlərdədirlər: “Bu bir faktdır və bu fakt Ermənistanın KTMT planını bundan sonra da pozacaq. Azərbaycanın KTMT-yə üzv dövlətlərin Ermənistan xaric hər biri ilə çox sıx iqtisadi, siyasi, mədəni əlaqələri, əməkdaşlığı var. Bu əlaqələr, əməkdaşlıq gün-gündən dərinləşir. Odur ki, Ermənistan KTMT-ni süni şəkildə istismar etmək cəhdlərindən əl çəkməli və Azərbaycanla sərhədlərin delimitasiyası, demarkasiyası prosesinə başlamalıdır. Ermənistan üçün bu daha məqbuldur, nəinki nəticəsi olmayacaq cəhdləri davam etdirmək...”