Rövnəq Abdullayev: "Bu memorandum AFFA üçün vacib hadisədir"

İdman
14 Nis 2021
13:47
Rövnəq Abdullayev: "Bu memorandum AFFA üçün vacib hadisədir"


"Türkdilli ölkələrin futbol assosiasiyaları arasında bu gün imzaladığımız Anlaşma Memorandumunun gələcək fəaliyyətimizdə xüsusi önəmi olacağına inanırıq".


"Report"un məlumatına görə, bunu AFFA-nın prezidenti Rövnəq Abdullayev türkdilli ölkələrin futbol assosiasiyaları arasında Anlaşma Memorandumu imzalanan zaman deyib.

Funksioner bildirib ki, bu memorandumun imzalanması AFFA üçün vacib hadisədir: "Əminik ki, bütün həmkarlarımız bundan məmnundur. Bildiyiniz kimi, memorandum qarşılıqlı əməkdaşlıqla bağlı bir çox məqamları özündə əks etdirir və qarşıdakı illərdə futbolun inkişafı ilə bağlı bütün istiqamətlərdə təcrübəmizin paylaşılması baxımından əlavə üstünlük yaradan bir platformadır. Əlbəttə, çox istəyərdik ki, bu cür vacib və tarixi əhəmiyyətli sənədin imza mərasimi canlı görüş formatında təşkil olunsun. Təəssüf ki, son dövrlərin məlum səbəbləri ucbatından bu gün onlayn formatda görüşməli oluruq. Ümid edək ki, gələcəkdə bu memorandumdan irəli gələn bütün məsələlərin həlli ilə bağlı müzakirələrin aparılması zamanı onlayn görüş zərurəti olmayacaq. Bir daha hər birinizə təşəkkür edir, Anlaşma Memorandumunun imzalayan bütün futbol assosiasiyaları üçün xeyirli-uğurlu olmasını arzulayıram!”